TIRANË — Në kuadër të revolucionit digjital dhe përpjekjeve për të modernizuar menaxhimin e tubimeve qytetare, Agjencia Kombëtare e Shoqërisë së Informacionit (AKSHI) në bashkëpunim me Drejtorinë e Përgjithshme të Policisë së Shtetit, kanë prezantuar sot shërbimin më të fundit në portalin e-Albania: “Aplikim për Thyerje Kocke të Personalizuar nga FNSH”. Sipas autoriteteve, ky shërbim inovativ vjen për t’i dhënë fund kaosit në sheshe dhe fluksit të papritur në Spitalin e Traumës, duke u mundësuar protestuesve të planifikojnë zhdëpjet në dru sipas dëshirës.
Gjatë prezantimit të modulit të ri, zëdhënësi i Ministrisë së Brendshme, Thimo Micka, e cilësoi këtë si një hap gjigant drejt standardeve evropiane të ruajtjes së rendit. “Koha kur policia godiste kuturu me shkop gome, duke i thyer qytetarit klavikulën ndërkohë që ai kishte thjesht nevojë për një ndrydhje të lehtë të kyçit, ka përfunduar njëherë e përgjithmonë,” theksoi zëdhënësi para mediave. “Përmes e-Albania, ne ofrojmë transparencë. Efektivët e policisë do të kenë në tabletat e tyre një listë të saktë të kockave të rezervuara për t’u thyer, duke shmangur kështu mbivendosjet dhe keqkuptimet me qytetarët.”
Procedura është e thjeshtë dhe mund të kryhet nga çdo smartphone:
- Identifikimi: Qytetari logohet me kredencialet e tij në e-Albania, 48 orë para orarit zyrtar të protestës.
- Harta Anatomike 3D: Hapet një modul interaktiv ku shfaqet një skelet njerëzor. Qytetari klikon mbi kockën që dëshiron t’i thyhet (p.sh., Tibia e djathtë, tre brinjë në anën e majtë, apo kërci i hundës).
- Zgjedhja e Mjetit: Ka një menu me opsione (“Drop-down”) për mjetin e preferuar të goditjes; Shkop gome standard, Shkop gome me fibër karboni, Çizme numër 44, ose Shtyrje brutale pas asfaltit.
- Gjenerimi i Barkodit: Pas aplikimit, sistemi gjeneron një barkod unik (QR Code).
Gjatë protestës, qytetari mjafton t’i tregojë barkodin punonjësit të FNSH-së me skafandër. Pasi polici skanon kodin, kryen procedurën e thyerjes saktësisht në vendin e kërkuar, falënderon qytetarin për mirëkuptimin dhe kalon te viktima e radhës.
Shërbimi është pritur çuditërisht mirë nga protestuesit. Agimi, një 55-vjeçar i cili merr pjesë në çdo tubim që prej dhjetorit të 1990-s, u shpreh tejet i lehtësuar. “Dje aplikova për të thyer krahun e majtë,” tregon ai teksa i vendosin allçinë te Trauma. “Unë jam djathtak dhe më duhet dora e djathtë për të pirë kafen e mëngjesit dhe për të mbajtur pultin e televizorit. Më parë hyja në protestë i tmerruar, se nuk dija ç’kishte rezervuar fati. Tani e di me saktësi çfarë më pret. Aplikova për thyerje të thjeshtë të krahut, polici pa QR Kodin, më dha një goditje të pastër ortopedike dhe më uroi shërim të shpejtë.”
Ministria e Shëndetësisë bën me dije se qytetarët që aplikojnë përmes e-Albania fitojnë gjithashtu një zbritje prej 10% nëse blejnë paterica te farmacia e Kolit.
Mohim Përgjegjësie
Lemza News është një publikim satirik. Artikujt, historitë dhe përmbajtja e publikuar në këtë faqe janë pjellë e imagjinatës ose parodi të ngjarjeve reale. Emrat e përdorur, përveç atyre të figurave publike të cilët janë subjekt i satirës, janë fiktivë. Çdo ngjashmëri me persona realë, të gjallë apo të vdekur, është krejtësisht e rastësishme. Përmbajtja nuk duhet të merret si faktike apo serioze.
