TIRANË — Altin Zejtari, një 34-vjeçar që beson me bindje absolute se stuhitë, tërmetet dhe eklipset janë mesazhe të drejtpërdrejta paralajmëruese nga Krijuesi, ka bërë dje një status të gjatë në Facebook për të denoncuar mitin e plakave si “injorancë e thellë e shoqërisë sonë”.
Sipas tij, të besosh se një grup plakash sfiduan muajin Mars dhe ky i fundit mori hua disa ditë nga shkurti për t’i ngrirë të gjalla në mal, është një “bestytni pagane, e prapambetur dhe tërësisht e palogjikshme”.
Në postimin e tij, i cili mori dhjetëra komente mbështetëse nga miq me mjekra të kuruara me kujdes, Altini argumentoi se njeriu modern duhet t’i besojë vetëm të vërtetave absolute të përçuara nga Krijuesi i Universit dhe jo përrallave me gjyshe që ngrijnë me dhi nëpër male.
“Si mundet një muaj të marrë ditë borxh nga një muaj tjetër? Kjo bie ndesh me çdo logjikë të shëndoshë!” shkruante Altini, vetëm pak minuta pasi kishte falur namazin pranë xhamisë “Dine Hoxha”. “Ne duhet të distancohemi nga këto mite injorante dhe t’i besojmë vetëm asaj që është shkruar në Tekstet e Shenjta të përçuara nga goja e vetë Krijuesit të Madhërishëm.”
Kritika e të riut ndezi reagime të ashpra në komunitetin shkencor. “Ajo që Altini dhe miqtë e tij nuk arrijnë të kuptojnë është thelbi i folklorit,” thekson meteorologu i mirënjohur Tritan Malavita. “Po, historia e plakave arrogante është një trillim, por fenomeni i rikthimit të masave ajrore polare në fund të marsit, për shkak të paqëndrueshmërisë së ekuinoksit pranveror, është një fakt meteorologjik i pamohueshëm. Për shekuj me radhë, shoqëritë agrare pa aplikacione AccuWeather, përdorën përrallën e “Plakave” si një paralajmërim për bujqit dhe barinjtë që të mos i nxirrnin kopetë shumë herët në mal, sepse moti i ftohtë do të kthehej papritur. Përralla ishte si një Push Notification i epokës mesjetare.”
Paradoksi arriti kulmin të mërkurën në mbrëmje. Pasi qëndroi dy orë në ambientet e hapura të lokalit vetëm me një këmishë të hollë pambuku për të zhvlerësuar mitin e Plakave, Altini u kthye në shtëpi me temperaturë 39.5 dhe një rrufë të flamosur.
Megjithatë, i palëkundur në bindjet e tij, ai sërish refuzoi t’i jepte meritën fenomenit meteorologjik. “Nuk u sëmura nga Plakat, se ato janë mite pagane idiote,” shkroi ai. “Kjo temperaturë është thjesht një sprovë nga i Madhi Zot për të testuar durimin tim. Elhamdulilah për çdo teshtimë!”
Mohim Përgjegjësie
Lemza News është një publikim satirik. Artikujt, historitë dhe përmbajtja e publikuar në këtë faqe janë pjellë e imagjinatës ose parodi të ngjarjeve reale. Emrat e përdorur, përveç atyre të figurave publike të cilët janë subjekt i satirës, janë fiktivë. Çdo ngjashmëri me persona realë, të gjallë apo të vdekur, është krejtësisht e rastësishme. Përmbajtja nuk duhet të merret si faktike apo serioze.
