TIRANË — Duke folur para Asamblesë së Partisë të shtunën, KM theksoi ambicien e tij më të re dhe më të guximshme deri më sot: t’u jepet mundësia qytetarëve të votojnë pa pasur frikë për vendin e punës. Në mungesë të një inovacioni tjetër për të mbajtur vëmendjen e publikut, kreu i qeverisë hodhi një koncept të huazuar nga Evropa Perëndimore, të quajtur “zgjedhje të lira dhe të ndershme”.
Duke e prezantuar si një lëshim të jashtëzakonshëm dhe një sakrificë personale të qeverisë, KM shpjegoi se si do të funksionojë ky mekanizëm i panjohur më parë dekadat e fundit.
“Do të fusim konceptin e votës së lirë. Besoj se për këtë ne jemi nja 30 vjet vonë, por kemi të gjithë kohën e nevojshme t’i thërrasim shqiptarët në kuti, pa u dërguar patronazhistin te dera e shtëpisë për t’u kujtuar se kush ua jep rrogën,” tha ai para të pranishmëve që e dëgjonin të shokuar. “Është një eksperiment i guximshëm, por jemi gati ta marrim këtë rrezik.”
Reagimi institucional ishte i rrufeshëm. Vetëm tre ditë më vonë, kreu i grupit parlamentar socialist, Hetem Tëmthi, prezantoi në Kuvend një projektligj të ri të titulluar “Për lejimin e Zgjedhjeve të Lira në Republikën e Shqipërisë”. Sipas tij, ky ligj nuk do të zëvendësojë sistemin aktual të fitores së sigurt, por do të shërbejë thjesht si një mekanizëm shtesë për qeverinë.
“Ky është thjesht një mjet alternativ për t’u këshilluar me zgjedhësit,” sqaroi Tëmthi nga foltorja e Kuvendit. “Ka ardhur koha për pak adrenalinë, kështu që le të aktivizojmë këtë ligj dhe të shohim se çfarë mendon vërtet populli. Natyrisht, nëse rezultati nuk na pëlqen, ne rezervojmë të drejtën të kthehemi te sistemi ynë tradicional i numërimit.”
Nisma e re ka shkaktuar kaos të paparë në të dyja kampet politike. Nga njëra anë, mijëra punonjës të administratës publike janë shprehur të frikësuar nga kjo barrë e re e “mendimit të lirë”. Nga ana tjetër, ka prishur gjithë strategjinë elektorale të opozitës, e cila bazohej te dalja në konferencë për shtyp të hënën në mëngjes për të denoncuar vjedhjen e votave.
Mohim Përgjegjësie
Lemza News është një publikim satirik. Artikujt, historitë dhe përmbajtja e publikuar në këtë faqe janë pjellë e imagjinatës ose parodi të ngjarjeve reale. Emrat e përdorur, përveç atyre të figurave publike të cilët janë subjekt i satirës, janë fiktivë. Çdo ngjashmëri me persona realë, të gjallë apo të vdekur, është krejtësisht e rastësishme. Përmbajtja nuk duhet të merret si faktike apo serioze.
