Hetimi / Zgarat korçare janë në fakt transformers

TIRANË — Shumë nga ju mund t’i keni bërë vetes pyetjen: Pse një qebaptore tradicionale, që shet kërnacka dhe birrë të hapur, mban emra të tillë si “Zgara Optimus”, “Zgara Supreme”, apo “Zgara Prime”? Sot, e vërteta ka dalë në dritë dhe është shumë herë më e frikshme nga ç’mendohej. Sipas një investigimi të fundit, këto struktura janë në fakt alienë nga planeti Cybertron, të cilët kanë marrë formën e zgarave të lagjes për t’u fshehur nga njerëzimi.

Inspektorati Kombëtar i Mbrojtjes së Territorit ka vëzhguar prej muajsh aktivitetin e dyshimtë të këtyre subjekteve pas orës 02:00 të mëngjesit. Pamjet e kamerave të sigurisë tregojnë se si “Zgara Optimus” te Rruga e Kavajës transformohet në robot alien sapo ikën klienti i fundit i dehur.

“Aspiratorë e mëdhenj metalikë që nxjerrin tymin drejt tarracës së pallatit janë në fakt sistemet hidraulike të këmbëve,” shpjegon Bilal Shtërgu, inxhinier pranë IKMT. “Ndërsa vitrina e xhamit ku ekspozohen bërxollat e marinuara kthehet në kraharorin e robotit. Tani e kuptojmë pse u duhet aq shumë qymyr. Jo vetëm për të pjekur mish. Qymyri është i vetmi burim energjie në Tokë që mund të zëvendësojë substancën aliene ‘Energon’, për të mbajtur motorët e tyre gjallë.”

Dëshmitarët okularë, kryesisht studentë që kthehen vonë nga diskotekat, kanë raportuar herë pas here luftime të ashpra në mesnatë.

“Isha një natë te kryqëzimi i 21 Dhjetorit, dhe pashë një zgarë korçare që u ngrit në këmbë dhe nxori një shpatë flakëruese me erë qepësh,” rrëfen një student 22-vjeçar, ende në gjendje shoku. “Përballë tij ishte një sufllaqeri greke, shndërruar në Decepticon, duke gjuajtur salcë xaxiqi nga krahu i majtë. Optimus Prime korçar e goditi me një shishqebap dhe fitoi. Pastaj u transformua sërish dhe në orën 7 të mëngjesit po nxirrte prapë tym sikur të mos kishte ndodhur asgjë.”