TIRANË — Banorët e një pallati në Rrugën e Kavajës u zgjuan të tmerruar rreth orës 3:00 të mëngjesit të sotëm nga britmat rrëqethëse të fqinjit të tyre. Sokol B., një patronazhist veteran i nivelit të tretë, ishte zgjuar i mbuluar në djersë të ftohta pas një makthi paralizues ku perandoria e tij prej 820 llogarish false ishte tkurrur në mënyrë të pashpjegueshme në vetëm 350.
Duke pirë ujë me sheqer për të qetësuar rrahjet e zemrës, 34-vjeçari i tregoi gazetarëve të Lemza News tm errin e paimagjinueshëm që kishte përjetuar në ëndërr.
“Ishte si një skenë nga filmat horror,” tregon Sokoli. “Në ëndërr, protesta kishte arritur nivele rekord pjesëmarrjeje. Mora laptopin për të nisur një fushatë spontane mbështetjeje qytetare, por kur hapa tabelën e Excel-it, gjysma e rreshtave ishin bosh! Kisha vetëm 350 profile aktive! Me aq profile nuk dominon dot as një sondazh banal në portalet e lajmeve, e lëre më të pastrosh imazhin e liderit!”
Për t’u siguruar që tragjedia ishte vetëm një trillim i trurit të tij të lodhur, Sokoli u detyrua të hapte laptopin në mes të natës. Ai kaloi plot dy orë duke pëlqyer statuset e vjetra të ministrave duke përdorur me radhë 150 profile të ndryshme gjimnazistësh inekzistentë, derisa iu kthye qetësia shpirtërore.
“Tani jam mirë, i pashë që ishin të gjithë aty, të shëndetshëm dhe gati për të denigruar me komente të kobshme vajzat në protestë,” tha ai. “Por ishte një paralajmërim nga Perëndia. Sot, për inat të ëndrrës, do të krijoj edhe 100 llogari të tjera fermerësh pro qeverisë, për t’i pasur rezervë për ditë të zeza.”
Mohim Përgjegjësie
Lemza News është një publikim satirik. Artikujt, historitë dhe përmbajtja e publikuar në këtë faqe janë pjellë e imagjinatës ose parodi të ngjarjeve reale. Emrat e përdorur, përveç atyre të figurave publike të cilët janë subjekt i satirës, janë fiktivë. Çdo ngjashmëri me persona realë, të gjallë apo të vdekur, është krejtësisht e rastësishme. Përmbajtja nuk duhet të merret si faktike apo serioze.
