TIRANË — Gati gjashtë dekada më parë, fotografi i Komitetit Qendror, shoku Llazi Tymi, nuk i kushtoi shumë rëndësi një seti fotografik ku babai i kombit, Enver Hoxha, po lante një foshnjë topolake në një govatë teneqeje. Askush nuk e dinte se, vite më vonë, foshnja do të bëhej Lideri Global, Edi Rama.
“Nuk kam qenë kurrë besimtar,” shprehet fotografi, tashmë 92 vjeç. “Por kam filluar të kem dyshime. Të trashëgosh pushtetin nëpërmjet shkumës së sapunit është vërtetë hyjnore. Unë e quaj Profecia e Govatës.”
Sipas një nënshkrimi në pjesën e pasme të fotografisë, ajo është shkrepur në fund të vitit 1964, si pjesë e një kalendari propagandistik të prodhuar nga gazeta Zëri i Popullit, me temë: “Fëmijë të pastër për një Socializëm të pastër”.
Një Enver i sëmurë u nda nga jeta në vitin 1985, kur shteti ishte në telashe të thella financiare dhe i izoluar nga bota. Edvini shpërtheu si forcë e pandalshme politike rreth dy dekada më vonë. Sot, profecia e govatës përmbushet, duke bërë që foshnja e fotos të marrë kontrollin absolut të shtetit.
Fotoja konfirmon se pushteti në Shqipëri nuk fitohet në zgjedhje, por trashëgohet në mënyrë mistike me ujë të vakët dhe sapun Rrogozhine.
Mohim Përgjegjësie
Lemza News është një publikim satirik. Artikujt, historitë dhe përmbajtja e publikuar në këtë faqe janë pjellë e imagjinatës ose parodi të ngjarjeve reale. Emrat e përdorur, përveç atyre të figurave publike të cilët janë subjekt i satirës, janë fiktivë. Çdo ngjashmëri me persona realë, të gjallë apo të vdekur, është krejtësisht e rastësishme. Përmbajtja nuk duhet të merret si faktike apo serioze.
