LUSHNJË — Kur e bija i prezantoi të dashurin e saj të ri, Dilaver Poloska, tregtar veteran i shalqinjve nga periferia e Lushnjës, shmangu metodat tradicionale të marrjes në pyetje dhe kaloi direkt në analizën akustike me anë të goditjes me noçka në kafkë.
Ngjarja e pazakontë u raportua paraditen e sotme, kur i riu iu nënshtrua Dilaverit, teksa ky i fundit e rrotullonte nga supet njëlloj siç bën me një bostan 9-kilogramësh para se ta peshojë.
“CV-ja dhe llogaria bankare gënjejnë,” shpjegoi Dilaveri për Lemza News. “Kurse trokitja e noçkave mbi lëvore nuk gënjen kurrë. Një dhëndër i mirë dhe i pjekur lëshon një kumbim të thellë. Kur i rashë këtij djalit te balli, tingëlloi si kungull, nuk ka pikë lëngu. Ky as për reçel nuk bën, lëre më burrë për gocën time!”
I riu, i cili mbante një qese me akull te balli pas goditjeve testuese, rrëfeu momentet e tmerrit.
“Unë prisja të më pyeste se ku punoja apo çfarë makine kisha,” tha i riu me zë të dridhur. “Por ai më tha përkulu pak të të shoh bishtin, nëse e ke të njomë apo të tharë. Pastaj më ra tre herë te koka dhe turfulloi i zhgënjyer. Më e keqja ishte kur i tha të shoqes ‘Sille pak thikën ta hapim për provë se nuk i zë besë’.”
Sipas burimeve, për momentin lidhja është pezulluar.
Mohim Përgjegjësie
Lemza News është një publikim satirik. Artikujt, historitë dhe përmbajtja e publikuar në këtë faqe janë pjellë e imagjinatës ose parodi të ngjarjeve reale. Emrat e përdorur, përveç atyre të figurave publike të cilët janë subjekt i satirës, janë fiktivë. Çdo ngjashmëri me persona realë, të gjallë apo të vdekur, është krejtësisht e rastësishme. Përmbajtja nuk duhet të merret si faktike apo serioze.
