TIRANË — 28-vjeçari Bledi Kore, performues i zhanrit stand-up në klubet e kryeqytetit, mësohet se ka thyer një tjetër kufi të mungesës së origjinalitetit. Këtë herë, ai është kapur në flagrancë me material plagjiaturë gjatë sakramentit të rrëfimit në Kishën Katolike.
“Ishte rrëfim plagjiaturë nga fillimi në fund,” tregon At Gjoni për Lemza News. “Ia kishte kopjuar Sonit, çunit të Bino Fratarit. Ai është dënuar për prostitucion në Itali dhe tani punon në një baxho në Rrëshen.”
Ekspertët e komedisë dhe ata të teologjisë shpjegojnë se standup-i dhe rrëfimi te prifti janë të vetmet zhanre që kërkojnë zhveshje totale të shpirtit. Ti nuk mund të pendohesh për traumën e dikujt tjetër, ashtu siç nuk mund të bësh për të qeshur me të.
I vënë me shpatulla pas murit, komediani i ri u përpoq të justifikohej me faktin se jeta e tij ishte “shumë e mërzitshme” për të mbajtur peshën e një rrëfimi interesant.
“Shiko, mëkatet e mia janë shumë të lodhura,” u shpjegua Bledi tek tymoste një cigare. “Çfarë t’i them priftit? Që shkarkova një film me torrent? S’ka tension dramatik, s’ka batutë. U ndjeva keq që po i harxhoja kohën Atit me mëkate banale, ndaj u detyrova të fusja pak material të kushos tim, Bino Fratarit.”
Mohim Përgjegjësie
Lemza News është një publikim satirik. Artikujt, historitë dhe përmbajtja e publikuar në këtë faqe janë pjellë e imagjinatës ose parodi të ngjarjeve reale. Emrat e përdorur, përveç atyre të figurave publike të cilët janë subjekt i satirës, janë fiktivë. Çdo ngjashmëri me persona realë, të gjallë apo të vdekur, është krejtësisht e rastësishme. Përmbajtja nuk duhet të merret si faktike apo serioze.
